КҮНДҮН ЖАҢЫЛЫКТАРЫ

• Эртеңден тарта Бишкекте электробустар каттай баштайт.

Муниципалитеттен билдиришкендей, алгачкы этапта №4, №10, №11 транспорт каттамга чыгат. Андан кийинки этапта №14, №66, №33 каттамдарга электробустарды кое берүү пландалууда.

Эске салсак, жыл башында Кытайдан 120 электробус алып келинип, ордо калаада аларды тейлөө борбору ачылган.

• Ушул жылдын алты айында чет өлкөдөгү жеке адамдар Кыргызстанга 1 млрд 980 млн доллар которду.

Улуттук банктын маалыматына караганда, сумманын көпчүлүгү же 1 млрд 844 млн доллары Россиядан келген. АКШдан 48 млн доллар, Түркиядан 7 млн доллар, Түштүк Кореядан 1,2 млн доллар которулган. Калган акча башка өлкөлөрдөн жөнөтүлгөн.

Маалыматка ылайык, быйылкы сумма былтыркы жылдын ушул мезгилине салыштырмалуу көп. 2024-жылдын январь-июнь айларында Кыргызстанга чет жактан 1 млрд 671 млн доллар келген.

 

• iPhone 17 Pro жана 17 Pro Max жаңы моделдери — Apple компаниясынын оюн (гейминг) үчүн максималдуу өндүрүмдүүлүккө багытталган алгачкы смартфондору болуп калды. Бул мүмкүнчүлүккө, айрыкча, түзмөктүн жылуулукту бөлүшүн кыйла жакшырткан буулантуу камерасы жана алюминий корпусу себеп болду. Бул тууралуу BigGeek Telegram-каналы билдирди.

Жаңы Apple A19 Pro чипи кубаттуулуктун өсүшүн көрсөткөнү менен, өндүрүмдүүлүктүн негизги фактору — жылуулукту натыйжалуу бөлүш. Бул ыкма процессордун максималдуу жыштыкта туруктуу иштешине шарт түзүп, троттлинг (кыскартылган иштөө режимине өтүү) маселесин алдын алды.