КҮНДҮН ЖАҢЫЛЫКТАРЫ

16.10.2025 11

Бишкектен Астанага түз аба каттамдары ачылат. Бул тууралуу “Кыргызстан аэропорттору” компаниясынан билдиришти. Учактар 10-ноябрдан тарта аталган багыт менен учуп баштайт.
Рейстерди казакстандык авиакомпания жумасына эки ирет — дүйшөмбү жана бейшемби күндөрү аткарат.

Кыргызстанда кафе, ресторандарга тейлөө үчүн өзүнчө төлөм алууга тыюу салынат. Тиешелүү токтомду Министрлер кабинети кабыл алды.
Чечим 2026-жылдын 1-январынан тартып күчүнө кирет. Ага ылайык, бардык кызматтар менюда көрсөтүлгөн баанын ичинде камтылышы керек.

Коомдук тамактануу жайларына менюларын, кассалык жана программалык системаларын жаңы тартипке ылайыкташтырып, көрсөтүлгөн мөөнөткө чейин тейлөө үчүн кошумча пайыздык төлөмдөрдү алып салуу сунушталат.

Ушул жылдын июнь-август айларында Ысык-Көл облусуна келген туристтердин саны 2 млн 330 миңден ашты. Бул тууралуу Керектөө рыногунун статистикасы башкармалыгынан маалым болду.
Ал эми жалпы республикага үч айда 3 млн 530 миңден көп турист келген.

Эс алуучулар Ысык-Көлдөн тышкары Чүй облусун, Ош шаарын жана Ош облусун тандаган.