КҮНДҮН ЖАҢЫЛЫКТАРЫ

12.11.2025 17

Токтогул ГЭСинде төртүнчү гидроагрегатты оңдоо иштери аяктады. Энергетика министрлигинен билдиришкендей, реконструкцияны франциялык компания аткарып, жумуштар 3 айды талап кылды. Жаңыланган Токтогул ГЭСинин кубаттулугу 240 мегаваттка көбөйүп, 1 миң 440 мегаватты түздү. Ошондой эле заманбап автоматташкан башкаруу системасы орнотулду. Иштердин башкы максаты — станциянын эксплуатация мөөнөтүн узартуу болуп саналат.

Кышкы жалпы республикалык тестирлөөгө 700дөн ашык абитуриент катталды. Бул тууралуу билимди баалоо жана окутуу усулдары борборунан билдиришти. Өз убагында каттоодон өтүүгө жетишпей калгандар үчүн 20-ноябрда кошумча каттоо уюштурулат. Ал Бишкек жана Ошто мамлекеттик университеттерде өтөт. Ал эми тестирлөөнүн өзү 21-23-ноябрга белгиленди.

MacBook Pro тарыхта биринчи жолу уюлдук байланышты колдоого алат. Apple корпорациясы сенсордук OLED-экран менен жабдылган MacBook Proну 2026-жылдын аягында же 2027-жылдын башында чыгарат. Бул тууралуу Bloomberg басылмасынан Марк Гурман билдирди. Бул жаңылануу 2021-жылдан бери MacBook сериясындагы эң чоң дизайн өзгөрүүсү болот. Ноутбук дагы жука корпус менен чыгат. Негизги технологиялык өзгөчөлүгү — 5G уюлдук байланышын колдоого алышы мүмкүн. Бул MacBook тарыхындагы биринчи учур болот. Буга чейин Apple ноутбуктарына мобилдик модем орнотпогон.