КҮНДҮН ЖАҢЫЛЫКТАРЫ

 

               Президент Садыр Жапаров Талас шаарынын борбордук аянтында өткөн мамлекеттик тууну көтөрүү салтанатына катышты.Эгемендүүлүктүн 35 жылдыгына арналган иш-чарада Улуттук гвардиянын кол башчысы рапорт берип, гимндин коштоосунда туу көтөрүлдү. Мамлекет башчысы өз сөзүндө элди биримдикке чакырып, өткөн тарыхтан сабак алуу менен жаңы Кыргызстанды куруу жолунда иш туура багытта баратканын баса белгиледи. Ошондой эле өлкөнүн башкы максаты — билимдүү жаштарды көбөйтүү жана өнүккөн мамлекетти түптөө экенин айтты.

 

 

​               Талас облусунда окуучулар үчүн жаңы мүмкүнчүлүктөрдү ачкан «Акылман» президенттик лицейи пайдаланууга берилди.Өлкөнүн Эгемендүүлүгүнүн 35 жылдыгына карата ачылган жаңы билим берүү мекемесинин салтанатына президент Садыр Жапаров катышты. Бул заманбап лицей эң акыркы үлгүдөгү жабдыктар менен камсыздалып, таланттуу окуучулардын сапаттуу билим алуусуна бардык ыңгайлуу шарттарды түзөт.

 

 

             Талас облусундагы майрамдык иш-чараларда коомдук коопсуздукту камсыз кылууга «Актөш» аттуу робот ит тартылды.Ички иштер министрлигинен билдиришкендей, бул заманбап технология милициянын ишмердүүлүгүнө инновациялык чечимдерди киргизүү максатында алып келинген. Учурда«Актөш» майрамдык аянттарда тартип сакчылары менен бирге коопсуздукту көзөмөлдөп, кызмат өтөп жатат. Бул чара милициянын салттуу иш ыкмаларын жаңы технологиялар менен айкалыштырууга багытталган.