КҮНДҮН ЖАҢЫЛЫКТАРЫ

• Бүгүнтөн тарта Бишкекте дагы бир көчө оңдоло баштайт
• Кыргызстан бир жолу колдонулуучу желим буюмдарга тыюу салат
• Грецияда күрөш боюнча дүйнө чемпионаты башталат

• Бүгүнтөн тарта Бишкекте Чыңгыз Айтматов проспектисинин Масалиевден Ахунбаев көчөсүнө чейинки бөлүгү оңдоо иштерине байланыштуу жарым-жартылай жабылат. Бул тууралуу мэриянын басма сөз кызматы билдирди.

Маалыматка ылайык, алгач бордюрлар жана арык лотоктор алынат — бул этапта унаалар үчүн жол ачык бойдон калат. Бирок жаңы асфальт төшөлө баштаганда кыймыл толугу менен токтотулат.

Оңдоо иштери эки айга созулат.

• 2027-жылдын 1-январынан тарта Кыргызстан бир жолу колдонулуучу желим буюмдарды өндүрүүгө, сатууга жана акысыз таратууга толугу менен тыюу салууну көздөп жатат. Бул тууралуу Министрлер кабинетинин төрагасы Адылбек Касымалиев билдирди.Чектөө бир жолу колдонулуучу желим идиш-аяктар, тамак-ашка арналган таңгактар, желим бөтөлкөлөр, кофе капсулалары жана азык-түлүк салчу баштыктарга тиешелүү болот. Анын алкагында калктын саламаттыгына жана өлкөнүн айлана-чөйрөсүнө зыянды азайтуу максатталууда.

• Бүгүн, 28-июлда Грециянын борбору Афина шаарында кадеттер арасында спорттук күрөш боюнча U-17 (17 жашка чейинки балбандар) дүйнө чемпионаты башталат. Дене тарбия жана спорт мамлекеттик агенттиктен билдиришкендей, алгач грек-рим күрөшү боюнча балбандар килемге чыгып, 48 кг, 55 кг, 65 кг, 80 кг жана 110 кг салмактык категорияларында күрөшөт.

  Аталган мелдеште Кыргызстандын намысын беш спортчу коргойт. Алар Жанарбек Сейитов (48 кг), Алхам Абдирасулов (55 кг), Адилет Өмүрбеков (65 кг), Нурислам Өскөнбаев (80 кг) жана Умар Орманов (110 кг).

  Таймаштар Бишкек убактысы боюнча саат 13:30 да башталат.

  Көңүл жубатуучу жана финалдык беттештер эртең болот.