КҮНДҮН ЖАҢЫЛЫКТАРЫ

• Мектепке дагы деле каттала элек балдар үчүн кошумча орундар ачылат.
• Борбор калаада «Мурас» подстанциясы курулууда.
• Бүгүнтөн тарта “Манас” эл аралык аэропортунун 1974-жылдан бери колдонулуп келаткан FRU деген коду BSZ деп өзгөртүлдү

 

• Мектепке электрондук каттоо системасында кошумча орундар ачылат. Билим берүү министрлигинин маалыматына ылайык, кабыл алуу 13-августта саат 9:00дө башталып, 15-августта аяктайт.

Каттоо, 8-августка чейин эч бир мектепке каттала элек балдар үчүн гана жеткиликтүү болот. Ал эми баласы мектепке катталган жарандар үчүн каттоону жокко чыгаруу мүмкүнчүлүгү каралган эмес.

Балдарды 1mektep.edu.gov.kg порталы аркылуу же «Түндүк» тиркемеси аркылуу каттоого болот. Ошондой эле ата-энелерге баланын туулгандыгы тууралуу күбөлүгү «Түндүк» тиркемесиндеги «Санарип документтер» бөлүмүндө көрүнүп турушун алдын ала текшерүү сунушталат.

 

• Бишкектин түштүк-батыш бөлүгүндө жогорку чыңалуудагы «Мурас» подстанциясынын курулушу уланууда. Энергетика министрлигинин маалыматына ылайык, объект футбол стадионуна жана мамлекеттик ипотекалык программа аркылуу курулган турак үйлөргө жакын жайгашат. Подстанция ишке берилгенден кийин «Ново-Южная», «Арча-Бешик» жана «Пиковая котельная» объекттериндеги жүктү азайтып, бул аймактагы электр менен камсыздоонун ишенимдүүлүгүн жогорулатат. Курулуш быйыл жыл аягына чейин аяктайт.

 

• Бүгүнтөн тарта “Манас” эл аралык аэропортунун 1974-жылдан бери колдонулуп келаткан FRU деген коду BSZ деп өзгөртүлдү. Үч тамгалуу уникалдуу идентификатор – Аба транспорту эл аралык ассоциациясы дүйнөнүн аэропортторуна ыйгарган код.

  Аны авиакомпаниялар, билет сатуу жана брондоо менен алектенген агенттиктер колдонушат. Код адатта аэропорт жайгашкан шаардын аталышына шайкеш берилет.